സ്വാഗതം!!

എന്റെയീ ചെറിയ കവിതകളുടെ ലോകത്തേക്കു സ്വാഗതം!!!

Tuesday, 25 December 2012

നീയെന്റെ കൂട്ടുകാരന്‍

ധാരയായ് ഒഴുകുന്ന മണമുള്ള സ്നേഹം
ആരുമാല്‍ മറക്കാന്‍ കഴിയാത്ത സ്നേഹം
നീയെന്റെ സൗരഭം നുകര്‍ന്ന കൂട്ടുകാരന്‍
നീയെന്റെ ജാലകം തുറന്നിട്ട കൂട്ടുകാരന്‍

ചിത്തത്തിലെ മഴക്കാറു മഴവില്ലായ്  മാറിടും
നിന്റെ മൃദുഹാസം പെയ്തൊഴിയുമ്പോള്‍.
ഹൃദ്യമായ് പാടുന്ന കുരുവിയും കൂട്ടായെത്തിടും
നിന്റെ മൊഴികള്‍ കളകളമൊഴുകുമ്പോള്‍.

സ്നേഹത്താളിയോലയില്‍ ആദ്യാക്ഷരം കുറിച്ചു-
നിത്യവസന്തമായ് സൗഹൃദം വിരിഞ്ഞ നാള്‍
പുല്‍ച്ചെടിത്തട്ടിലെ മഞ്ഞുതുള്ളിയെ കണ്ണോടണക്കെ-
കാഴ്ച്ചക്കു കുളിര്‍മ പകുത്തുനല്‍കിയ നാളുകള്‍

മഷിത്തണ്ടു പറിക്കുവനൊരുങ്ങുന്ന നേരം
കൈകോര്‍ത്തീത്തുമ്പിയെ പിടിക്കുവാന്‍ നേരം
തോര്‍ത്തിട്ടു പരലിനെ കോരുവാന്‍ നേരം
നിന്‍ സ്വപ്നച്ചങ്ങലയിലെ മലരായ് പൂത്തുപോയ്

ചള്ളകുഴച്ചൊരു വീടുണ്ടാക്കിയ മണ്ണില്‍
ചിരട്ട പൊതിഞ്ഞൊരു മണ്ണപ്പമൊരുക്കി നീ
ആടിയുലഞ്ഞൊരു ചില്ലയിലൂഞ്ഞാലിന്‍
ആയം കൂട്ടിത്തന്നൊരു കൈകള്‍ കാണ്‍പൂ

താരങ്ങളെ കണ്ടുറങ്ങുമ്പോഴും, നിശാ-
നീലിമയെ നിന്നിലേക്കൊളുപ്പിച്ചു ഞാന്‍
മുറിനിക്കറിന്‍ വള്ളിയില്‍ പിടിച്ചുവലിച്ചു
പൊയൊരു വിദ്യാലയദിനം പൊഴിഞ്ഞുപോയ്

മഴവെള്ളം ചെപ്പിക്കളിച്ച നാലുമണിനേരങ്ങള്‍
പുഴയായ് ഒഴുകിപ്പോയതു കണ്ടുഞാന്‍
പിന്നയുമീപ്പുഴ ഒഴുക്കു തുടരുന്നു, ഇന്നിന്റെ-
മാലിന്യം പേറി, ആരുമില്ലാതെ...

ചിത്രം കടപ്പാട് : ഗൂഗിള്‍.. 


Friday, 23 November 2012

വൈകി എത്തിയ സൂര്യന്‍

നിന്നിലെ മൗനമേ, നീറുന്ന കാറ്റിനെ
നെഞ്ചോട് ചേര്‍ത്തങ്ങു നീയുറക്കൂ
മഴയും തോര്‍ന്നില്ല, കനവും മാഞ്ഞില്ല
ഉണര്‍ത്തും വെയിലും വൈകിടുന്നൂ

കിഴക്കില്‍ പൂക്കുന്ന പുഷ്പമാം നിന്നെഞാന്‍
കണ്മിഴിക്കോണില്‍ ഉറക്കിയില്ലേ..
മാറാല മൂടിയ വീടിന്റെ കോണിലെ
ജാലകച്ചില്ലകള്‍ തുറക്കാറായ്

പതിവിന്റെ താളം മറന്നു പോകുന്നീ-
പഴമയില്‍ മുങ്ങിയ കാലചക്രം
ഇനിയും ഉണരാന്‍ മടിക്കും വേളയില്‍
താരാരാജാവിന്‍ ഒളിഞ്ഞുനോട്ടം

പൂജ്യനായ് വന്നെന്റെ പാദം കവര്‍ന്നൂ
തട്ടിവിളിച്ചി,ട്ടുണര്‍ത്തിടുന്നു
പരിഭവം കാട്ടീയീ മിഴികള്‍ നീട്ടി
നീരസഭാവത്തിന്‍ നോക്കിഞാനും

സ്വാന്തന കിരണം ചൊരിഞ്ഞീ മേനിയില്‍
ഇടവം ചതിച്ച കഥയോതി.
കഥയെ,ത്രമാറി തണുത്തെന്‍ മനവും
അശ്രുപൊഴിഞ്ഞൊരു വര്‍ഷമായ്

കാലമേ കാണുക നീയെന്റെ സൂര്യനെ
കാണാമറയത്തോളിച്ചിടാതെ..
സംസര്‍ഗ മിഥ്യയാം കണികയില്‍ കോര്‍ത്തു-
ഭൂമിതന്‍ മാറില്‍ കിടക്കൂന്നൂ ഞാന്‍

ചിത്രം കടപ്പാട് : ഗൂഗിള്‍.. 

 ഈ കവിത ഇവിടെ കേള്‍ക്കാം..

Thursday, 1 November 2012

അരികിലെത്തുമ്പോള്‍..

മിഴിനീരാഴിയിലെ കളിത്തോണിയായെന്‍ മനം
അഴിമുഖം കാണാതെയലഞ്ഞിടുന്നു.

തുരുമ്പെടുത്തു നീറുന്ന നങ്കൂരമകുടവും
നരച്ചൊരീ കണ്ണുമായ് വികലമായ് നോക്കീടുന്നു.

സാനുവിന്‍ ഓജസ്സു കൂടുന്നീയാഴിയില്‍
താനെ തുഴയുവാന്‍ ത്രാണിയും ചോര്‍ന്നുപോയ്

അശിനിപാതം പൊഴിച്ചിട്ടീ കാര്‍മേഘവും-
ലേശം കരുണയില്ലാതെയാര്‍ത്തുല്ലസിച്ചിടുന്നു

ദിക്കുകെട്ടനാഥമായ് ആടിയുലഞ്ഞീത്തോണി-
അക്കരക്കരയിലെ തീരം കൊതിച്ചിടുന്നു

ദിക്പഥം മുഴുവനും ജലവര്‍ഷഘോഷം
നൗകതന്‍ പഥസഞ്ചാരമോ മറഞ്ഞുപോയ്

ആരെത്തിടും അരികിലേക്കഭയമായ്-
ദൂരയീതീരം തേടും മനസിന്റെയുള്ളില്‍

തഴുകലില്‍ സ്പര്‍ശമായ് അരികിലെത്തുമ്പോള്‍
മിഴിനീരാഴി വറ്റിവരണ്ടിടും,കളിത്തോണിയും..
തുഴച്ചില്‍ നിര്‍ത്തി തീരത്തടിഞ്ഞിടും

ഈ കളിത്തോണിയും..
തുഴച്ചില്‍ നിര്‍ത്തി തീരത്തടിഞ്ഞിടും..


ചിത്രം കടപ്പാട് : ഗൂഗിള്‍..

Tuesday, 23 October 2012

അന്ധനായ സ്നേഹത്തിന്റെ കൂട്ടുകാരന്‍

ആലസ്യം അശക്തമാക്കിയ മനസ്
നിറങ്ങളെ വെല്ലുവിളിക്കും മിഴികള്‍
അന്തര്‍നാളം അനാദിയില്‍ 
അഴ്നിറങ്ങുന്നു..

ഉരലിന്നു ചുറ്റും കറങ്ങുന്ന-
ഉറുമ്പിന്നു ലോകം ഇട്ടാവട്ടം.
ധീരത ചോര്‍ന്ന ചിത്തത്തില്‍
വൈര്യം നിറച്ചിട്ടെന്തു കാര്യം

കുരുടന്റെ ഊന്നുവടിക്കും-
ബലമില്ലാതെ വന്നാല്‍-
"കരളിന്റെ സ്നേഹം ഭയമായ്-
ഒഴുകിടും,നദിയായി മാറിടും
പിന്നെ കടലിലേക്കെത്തിടും

പാലായനം ചെയ്ത   വഴിയും-
മറന്നുപോയിടും"

സ്നേഹം അന്ധമാക്കിയ
മനസിന്‍ വിലാപം മുറുകുന്നു...
ഒടുവില്‍, അന്തരംഗത്തിന്‍
തിരിനാളം എരിഞ്ഞൊടുങ്ങിടാം
അന്തരത്തിന്‍ അന്തിയാമങ്ങളില്‍ മൂകമായ്...

Tuesday, 16 October 2012

അവസാനം നീ മാത്രം.

നിന്നെ തലോടിയ വിരലിന്റെ ദാഹം-
എന്നേക്കുമായ് പോയ് മറഞ്ഞു.
നിന്നെക്കുറിച്ചുള്ള ഓര്‍മ്മകളൊക്കയും-
 മറവിക്കു കൂട്ടായ് മാറി.
നിന്നെ കണികണ്ട മിഴികളില്‍-
ചുവന്ന ഇരുട്ടും മൂടി.
നിന്നെയുറക്കിയ മാറിലെ സ്പന്ദം-
തുടിക്കാന്‍ കൊതിച്ചു നിലച്ചിടുന്നു.
നിന്നെയുണര്‍ത്തിയ ചൊടിയിലെ മൗനവും
താരാട്ടുപാട്ടു നിര്‍ത്തിടുന്നു.

നിന്നെ ചേര്‍ത്തുറക്കിയ രാത്രികള്‍
നിഴലായ്ച്ചുരുങ്ങി നിന്നിലേക്കണയുന്നു.
നീയുഴിഞ്ഞെടുത്ത എന്‍ ആത്മാവിന്‍-
ചിരാതില്‍ നീ നറുവെണ്ണയൊഴുക്കി-
യെന്‍ വര്‍ണ്ണമേലാപ്പണിയുമോ?
മിഴാവില്‍ തുള്ളും കളിപ്പാവയായ്-
കനവിലേക്കണയില്ല ഞാന്‍.
മനശംഖിലെ അഴിതന്‍ അര്‍ദ്രത
അലിയിച്ചിടട്ടെ ഞാന്‍ കടമെടുത്ത-
ജീവിതത്തിന്‍ അഴലുകള്‍..

Saturday, 13 October 2012

തിരികെ..

പ്രാര്‍ത്ഥനപ്പൂക്കള്‍ പൊഴിഞ്ഞ യാമത്തില്‍
മിഴിനീര്‍ വാര്‍ന്നൊരീ കവിള്‍തടത്തില്‍
സ്നേഹത്തിന്‍ കൈവിരല്‍ തലോടലുമായ്
പ്രിയനെന്‍ ചാരത്തണഞ്ഞിരുന്നെങ്കില്‍

തിളങ്ങുന്ന മുള്ളുവേലിച്ചരടില്‍ നീയെന്‍
ഭാരതാംബയെ കാവലായ് കാത്തിടുമ്പോള്‍
അര്‍ദ്രമായ് ഞാനെന്‍ പുണ്യമാം താലിച്ചരടില്‍
പിടിച്ചുരുവിടുന്നു ഇടറിയ പദധ്വനികള്‍

വെടിയൊച്ചമുഴങ്ങുന്ന വേളയിലെന്‍ മനതാരില്‍
ഹൃദയം ചെണ്ടമേളം മുഴക്കുന്നു..
എങ്ങനെയുണ്ണും ഞാന്‍ എങ്ങനെയുറങ്ങും ഞാന്‍
എല്ലാം പാതിവഴിക്കുപേക്ഷ കാട്ടിടുന്നു.

എവിടെയാണെങ്കിലും അങ്ങെന്‍ മാനസരാജ്യത്തിന്‍
സര്‍വ്വസൈന്യാധിപനായ് വാഴിടുന്നു.
മഹത്വംനിറഞ്ഞ മുഖമോര്‍ത്തിടുമ്പോള്‍
അഭിമാനപാരവശ്യം പൂണ്ടു അവേശയാകുന്നു.

"തിരികെയെത്തിടാം" എന്നോതിയാത്രയായനാള്‍
സ്നേഹത്തിന്‍ "സല്യൂട്ട്"  -
ചുംബനമായ് പൊഴിച്ചുപോയ്

വീണ്ടും ഒരു "തിരികെ"
സ്വാര്‍ത്ഥതയല്ലാത്ത മോഹമല്ലിത്..
"വീണ്ടും ഒരു തിരികെ"
കണ്ണിലെ നിശാപുഷ്പത്തെ പാതിവിടര്‍ത്തി
ഞാന്‍ കാത്തിരിപ്പൂ....
വീണ്ടും തീരികെ വരാന്‍....



Wednesday, 26 September 2012

നിനക്കുവേണ്ടി കുറിച്ചത്..

ആ മരത്തണലത്തു-  
    നീ വന്നീടുമ്പോള്‍
കാറ്റായ് മാറാന്‍
     ദാഹിച്ചു ഞാന്‍...
ആ മഴയത്തു-
    നീ നടന്നപ്പോള്‍
കുടയായ് മാറാന്‍
    മോഹിച്ചു ഞാന്‍..

മധുരമാം ഗാനം-
    കേള്‍ക്കുമ്പോള്‍..
മധുരമാ മാറില്‍-
    ചേരുമ്പോള്‍..
ഉള്ളിന്റെയുള്ളിലെ-
    കനലുകളൊക്കയും
കണ്ണുനീര്‍ത്തുള്ളീയായ്-
    മാറുന്നു..

സന്ധ്യാദീപം-
    തെളിയുമ്പോള്‍..
രാവിന്‍ ഈണം-
    പാടുമ്പോള്‍..
ജന്മാന്തരത്തിലെ-
    ബന്ധങ്ങളൊക്കയും
തോരാ മഴയായ്-
    പെയ്തിടുന്നു...


Sunday, 23 September 2012

അച്ചുവാര്‍ത്ത ജീവിതങ്ങള്‍

പട്ടിണി കിടക്കുന്ന-
വയറിന്‍ ചുവട്ടില്‍..
പക്ഷപാതം കാണിക്കുന്ന

തെരുവ്നായ്കള്‍..
ഒരുപറ്റുകിടാങ്ങള്‍.. 
ചൂഷണത്തിന്‍ ആലയില്‍
അച്ചുവാര്‍ത്തൊരു..
 ലോഹകഷണമാകുന്നു.

ചിലരതിനെ 

അന്ധപ്രതിമകളാക്കുന്നു..
ചിലരതിനെ
 ബധിരമൂകമാക്കുന്നു..
മറ്റുചിലരതനിനെ 

വികലമാക്കുന്നു..
തഥാ ചൂഴ്നെടുത്തിടും 

ബാല്യകണങ്ങളെ
തെരുവില്‍ വില്‍ക്കുന്നു.. 
പൊള്ള ലേലം വിളിക്കുന്നു..

നൂലുപൊട്ടിച്ച 
 പട്ടങ്ങളിവരില്‍
അന്ധരാഗങ്ങള്‍-
 നിറച്ചിടുന്നന്യര്‍.
കളങ്കമറിയാത്തവര്‍-
കളങ്കിതമാകുന്നു
രാക്കൂട്ടിനു-
കൂട്ടില്‍ കിടത്തി

വെളിച്ചമില്ലാ 
 പരത്താനവരില്‍...
വെളിച്ചമില്ലാ 
 പരത്താനവരില്‍...
ദിനചക്രത്തിന്‍-
 തീഷ്ണത
കൊന്നൊടുക്കുന്നീ  
 പുതു നാമ്പിനെ..

തിരിച്ചറിഞ്ഞിടുക 

തിരുത്തുക നാം..
തിരിച്ചറിഞ്ഞിടുക 

തിരുത്തുക നാം..  
അര്‍ഹമാം-
അറിവിന്‍ കിരണം,-
ചൊരിഞ്ഞൊരു -
പുണ്യകര്‍മംകൂടി ചെയ്തിടാം.
പ്രഭയൊരുങ്ങിക്കിടക്കും-
 നിലങ്ങളില്‍..
പുതുവിത്തുപാകി-

വളര്‍ത്തിയെടുക്കാം..

Wednesday, 12 September 2012

വലിച്ചെറിഞ്ഞ ചോറിന്റെ കഥ

അരിമണി നറുമണി നട്ടുവളര്‍ത്തിയ-
ഞാറ്റുമണ്ണിന്‍ തോറ്റം പാട്ടേ.-
കേള്‍കൂ നീയീഅനാഥപുത്രന്‍-
തന്‍ വിലാപകവ്യം

പാഴായ്ക്കിടപ്പതും പഴുതില്ലാ-
തറയില്‍ പറ്റിപ്പിടിച്ചതും ഞാന്‍
അയ്യോ!! അരും ചവിട്ടല്ലെയെന്നെ
ഒരു കാവ്യകഥകൂടി പറഞ്ഞിടട്ടേ

പണ്ടൊരു പാടത്തൊരു ചേറില്‍
വിത്തായ് വീണു പിടഞ്ഞുഞാന്‍
തണുത്തമണ്ണിന്‍ ലാളനമെന്നുടെ
നീറ്റലുമാറ്റി യൊരുക്കി മയക്കി

ഉഴുതുമറിച്ചു നിലം വിരിച്ചു
ഞാറ്റുപാട്ടിന്‍ താളമോടേ....
വിയര്‍പൊഴുക്കി മണ്ണിന്നുടയോന്‍
കടഞ്ഞെടുത്തൂ പുഞ്ചപ്പാടം..

കഷ്ടപ്പാടിന്‍ തീഷ്ണതയില്ലാ-
തായിരം കൈകളെന്നെത്തലോടിയീ-
മണ്ണിന്‍ മനസില്‍ കിടന്നൂവളരാനന്നെ
വര്‍ഷമേഘമനുഗ്രച്ചിടുന്നൂ...

തളിരായ് കിളിര്‍ത്തുഞാന്‍..
കതിരില്‍ വളര്‍ന്നു ഞാന്‍
തഴുകാന്‍ വീണ്ടുമെത്തിയോരൊ
കരുതലില്‍ ഹസ്തവര്‍ഷങ്ങള്‍

ചിങ്ങപുലരിയില്‍ വിളഞ്ഞു തെളിഞ്ഞു
പൊന്നണിഞ്ഞു പരന്നു കിടക്കും-
നെല്ലിന്‍ന്നിടയില്‍ വിളങ്ങിയ
ഏഴരപ്പൊന്നിന്‍ അഴാകാണു ഞാന്‍

കൊയ്ത്തു പാട്ടിന്‍ താളമേറി
അരുമകരങ്ങള്‍ എത്തിടുമ്പോള്‍
നിരയായ് നിന്നുകൊടുത്തീയീ-
അരിവളിന്‍ ചുമ്പനമേല്‍ക്കാന്‍

പുഴുങ്ങിയുണക്കി വിരിച്ച പരമ്പില്‍
പവിഴം പോല്‍ വാണുവിളങ്ങി..
കുത്തിപ്പൊടിച്ചിട്ടു പുറംചട്ട മാറ്റി
പുറത്തെടുത്തീ നറുമണീ തിങ്കളെ..

പുത്തരിച്ചോറായ് തിളച്ചുമറിഞ്ഞുഞാന്‍
പുണ്യമായ് മാറുമെന്നോര്‍ത്തുമാത്രം..
പുത്തരിച്ചോറായ് തിളച്ചുമറിഞ്ഞുഞാന്‍
പുണ്യമായ് മാറുമെന്നോര്‍ത്തുമാത്രം..

എങ്കിലുമെന്നെയാരൊ വലിച്ചെറിഞ്ഞൂ..
നിറഞ്ഞ വയറിന്‍ എച്ചിലായീ..

എങ്കിലുമെന്നെയാരൊ വലിച്ചെറിഞ്ഞൂ..
പുച്ഛമാം ഭാവത്തിന്‍ മൂര്‍ച്ഛയോടെ.

ഇക്കഥയൊന്നോര്‍ത്തുകൊള്‍ക വിളവിന്റെ-
കഥയൊന്നോര്‍ത്തുകൊള്‍ക !!!


Tuesday, 4 September 2012

ചാലയുടെ വെമ്പല്‍

ചക്രവാകം എത്തിടുമ്പോള്‍
ചത്തിടുന്ന ചിന്തകള്‍
കെട്ടണഞ്ഞീ  ജീവനങ്ങള്‍
 അഗ്നിരേവടത്തിന്‍ കൈകളാല്‍

ചുഴലിയെത്തി തുള്ളിയാടി-
അഗ്നിമാലയണിഞ്ഞതാല്‍
കറുത്തവണ്ടി ചുമലെടുത്ത-
വാതകേതു ഛിന്നമായ്

രാത്രീകരന്‍ വന്നെത്തിയെങ്ങൊ-
രാത്രിക്കു തീക്കൂട്ടുവച്ചിടാന്‍
ആരും തണുത്തു വിറച്ചില്ലെങ്കിലും
തീതുപ്പുടിന്നരാത്രിയായ്

പൊട്ടിത്തെറി, അലര്‍ച്ച, മുഴക്കങ്ങള്‍
അറുത്തിട്ടു പഞ്ചഭൂതപ്രതിമകളെ-
ഗ്രസിച്ചുല്ലസിച്ചാടി തിമിര്‍ത്തൂയീ-
പഞ്ചഭൂതങ്ങളില്‍ പ്രഥമന്‍

ഒളിയുദ്ധം നടന്ന രണഭൂമിയില്‍
കഴുകന്‍ കണ്ണുകള്‍ പരക്കുന്നു
കരച്ചിലിന്‍ ധ്വനിമുഴക്കം -
നിറഞ്ഞു കറുത്തു- ഈ ചാല
 
വെന്തുരികിയ അരുമകളും
പാതിയില്‍ നിലച്ചജീവനുകളും
ശേഷിപ്പതു ദുരന്തമുദ്രണമായ്

പ്രാര്‍ഥനാമൃതം ചൊരിഞ്ഞിടാം
നമുക്കീ മണ്ണില്‍ കൈകോര്‍ത്തിടാം
പുല്‍ക്കൊടിയിനിയും തളിര്‍ക്കട്ടീ മണ്ണില്‍..
പുല്‍ക്കൊടിയിനിയും തളിര്‍ക്കട്ടീ മണ്ണില്‍..

Sunday, 19 August 2012

ഓണം തിരുവോണം

മനസില്‍ വിരിയുന്ന
      മലരാണീപ്പൊന്നോണം..
കനവില്‍ നിറയുന്ന
      കഥയാണീപ്പൊന്നോണം.
അഴലുകള്‍ മാറ്റുന്ന
      പുതുനിലാവായ്..
അരികിലെത്തീയെന്‍
      തിരുവോണം..
അരികിലെത്തീയെന്‍
      തിരുവോണം.

ചിങ്ങത്തുടിപ്പിന്റെ
       ചിന്തുകള്‍ പാടുന്ന-
പൂത്തുമ്പിയെങ്ങും
        നിറഞ്ഞുനില്‍ക്കെ
ഓര്‍മ്മകള്‍ പൂക്കളം
       ഒരുക്കുന്ന-
തിരുമുറ്റത്തൊരുകോണില്‍
      ഞാനും നിന്നിടുന്നൂ..
ഒരു കോണില്‍
       ഞാനും നിന്നിടുന്നൂ..

ഉത്രാടരാത്രിയില്‍ 
       എത്തുന്ന ലാവിന്റെ
കസവൊളിയിന്നെന്‍
         പുതുശ്ശീലയായ്..
ചന്ദനക്കുറിയിട്ടു 
         ചഞ്ചലമിഴികളാല്‍
ചൈത്രസുഗന്ധിക
         വിരിഞ്ഞു നില്‍ക്കേ..
ഈ ചൈത്രസുഗന്ധിക
         വിരിഞ്ഞു നില്‍ക്കേ..

Sunday, 12 August 2012

നക്ഷത്ര സഞ്ചാരം

ദിക്കുകള്‍ ഏതെന്നറിയാതെ ജനിച്ച-
താരകം ദിക്കോടുദിക്കലഞ്ഞു നടന്നിടുന്നു
കറുത്ത മാനമനോഹരിക്ക് വെള്ളി-
പൊട്ടുകുത്തുകള്‍ക്കിടയില്‍ തിളക്കമായ്

ഭൂമിയില്‍ പിറക്കും മുന്‍പേയെന്നോടു-
കഥകള്‍ പറയാന്‍ തുടങ്ങിയ താരകം-
തലയില്‍ കുറിക്കാന്‍ നാരായമായ്
കാത്തിരുന്ന പോല്‍ കത്തിജ്ജ്വലിക്കുന്നു

വിന്യസിച്ചു ഒരു ജീവിത കഥയിന്നപോല്‍-
കുറിച്ചിട്ടു ശിരസിലെ വേരുപടലങ്ങളില്‍
ജനിച്ചിടാം നിന്റെ പേരിലിന്നീ ഭൂമിയില്‍
കടിഞ്ഞാണ്‍ നിന്റെ കയ്യിലെ ചാട്ടവാറാകരുതെ

ഗ്രഹത്തിന്‍ അഭ്രപാളിയില്‍ ആഴ്ന്നിറങ്ങും
അര്‍ത്ഥവാക്കുകള്‍ കുറിച്ചിടും ജ്യോതിഷലോകം
തെളിച്ചിടും അവ ജാതകമെന്ന മട്ടിലെന്നപോല്‍
പിന്നെ ഹരിച്ചും ഗുണിച്ചുമീ  ജനനമരണാവൃത്തിയില്‍

നക്ഷത്രമെ നീയെന്റെ കഥയാരോടു ചൊല്ലി?
ഇതു രഹസ്യമല്ലയെന്നതു ഞാനറിവൂ
അക്ഷുണ്ണരെന്‍ കിളിവാതില്‍ മുട്ടിവിളിച്ചീ-
അന്തര്‍ലീന തപസില്‍ കഠാരവച്ചു

നക്ഷത്രമെ നീയെന്റെ കവിതയെഴുതിയൊ?
അവാച്യമായതൊന്നുമില്ലെങ്കിലും
ആരൊക്കൊയൊ ഈരടിപദങ്ങളായ്-
താളത്തില്‍ പാടി തിമിര്‍ക്കുന്നു.

ജീവിതരാശി തിരഞ്ഞു ഞാനെന്‍
പൂര്‍ണ്ണഛായയെ അപൂര്‍ണമായ് നോക്കീടവെ
ഗതിവിഗതികള്‍ നിന്റെ കടങ്കഥക്കു-
ഉത്തരം പറയാതെ പകച്ചു നില്‍ക്കുന്നു


Monday, 23 July 2012

ഞാനൊരു ഗംഗ

നേരിന്റെ  നെറുകിലൂടൊഴുകുന്ന ഗംഗയില്‍
ആരിന്നു വിഷവിത്തു പാകി
തിരിഞ്ഞൊന്നു നോക്കൂ ഉത്തംഗമായൊരീ
ജഢയിലെ പുണ്യമാം പ്രണയശൃഷ്ടിയെ

പവിത്രമീ ആത്മാവു ഒഴുകുന്ന പുളിനങ്ങള്‍
പുണ്യമായ്,മാറിയിക്കാലമത്രയും
കാലാന്തരത്തില്‍ ഒളിപ്പിച്ചു വയ്ക്കും
പാപങ്ങളൊക്കെ ഒഴുക്കിക്കളഞ്ഞിടും
മോക്ഷപ്രദായിക ഈ ഗംഗ

ഞാനൊരു ഗംഗ, മനുഷ്യ ഗംഗ
തീരങ്ങളില്ലാതെ ഓളങ്ങളില്ലാതെ
ശാന്തമായ് ഒഴുകുന്ന ഗംഗ
ആരൊക്കെയോ വന്നു സ്നാനം-
ചെയ്തുപോയീ  സ്നേഹഗംഗയില്‍
പിന്നീടു പാപത്തില്‍ച്ചുട്ട രക്തം വീണു-
മലിനമായ് ഈ ഗംഗ
പിന്നെയാരൊക്കെയൊ വലിച്ചെറിഞ്ഞ വിഷവിത്തു-
കിടന്നു മുളച്ചുപോയീസ്നേഹഗംഗയില്‍,
മോചനം കിട്ടിയോ നിനക്കെന്നെസ്നേഹിച്ച-
പാപത്തില്‍ നിന്നുമെന്നേക്കുമായ്

പ്രവാഹം തുടര്‍ന്നു ഞാനാം ഗംഗ-
അനസ്യൂതമെന്നതു തന്നെയോര്‍ത്ത്

വീണ്ടും ഭഗീരഥന്മാരെത്തിടുന്നു
വഴിതിരിച്ചുവിട്ടു മറ്റൊരു മനസിനെ-
പുണ്യമാക്കാന്‍
പുതുപാപങ്ങളേറാന്‍ പോകട്ടെ-
ഞാനിന്നീ ഭഗീരഥനൊപ്പം

Sunday, 15 July 2012

വര്‍ണ്ണവിവേചനം

പകലുണ്ട് രാവുണ്ട് ഭൂമിയില്‍-
മദ്ധ്യേ തേങ്ങുന്ന സന്ധ്യയുമുണ്ട്
പേറുണ്ട് മൃതിയുണ്ട് ഭൂമിയില്‍
മദ്ധ്യേ വിളറിടും മനുജരുമുണ്ട്

ഇരുണ്ടും വെളുത്തും കറങ്ങുന്ന ഭൂമിയില്‍-
ഇരുളിന്റെ വര്‍ണ്ണവ്യത്യാസമുണ്ട്
എങ്കിലും നീയെന്റെ ചോരകാണൂ-
നിറഭേതമില്ലാത്ത ചോരകാണൂ

കാര്‍മേഘമുണ്ട്, തൂവെണ്മേഘമുണ്ടീ-
വാനില്‍,ഉദാത്തമായ് കാണുമോ നീ
ഇരുമേഘപടലമില്ലാതെയിന്നീ ഭൂവില്‍
വര്‍ഷവും ഗ്രീഷ്മവുമുണ്ടോ

അര്‍ക്കരനോടൊന്നു ചോദിപ്പൂഞാന്‍-
രജതമായ് എന്നിലേക്കണയുമോ നീ ?
ഭൂമിയില്‍ സ്വച്ഛത പരത്തുന്ന നേരത്തു-
നിന്നയും ഞാനൊ മറന്നു പോയി
ഈ സൂര്യനും കേണു മറഞ്ഞു പോയി

നിന്റെ വെളുപ്പിനെ എന്നിലേക്കേകുക
നീ കൂട്ടുകാരാ
തുല്യതയില്ലാതെ ദൂരത്തു നില്‍കുന്ന-
സ്നേഹത്തെയേകു നീ കൂട്ടുകാരാ
വകഭേതമില്ലാതെയി,ത്തീണ്ടലില്ലാതെ-
കൈകോര്‍ത്തിരിക്കൂ നീ കൂട്ടുകാരാ
ആകാരമില്ലാത്തൊരാകാശത്തിന്നു നാം
ആലംബമായൊന്നു മാറിനില്‍ക്കാം


Thursday, 5 July 2012

ശവപ്പറമ്പ്

ചാവുഗന്ധം ചുമന്നു  നില്‍ക്കും
ശവപ്പറമ്പിന്‍ കല്ലറക്കാടുകള്‍
കൂരിരുട്ടീന്‍ മറ വീഴിടുമ്പോള്‍
കുരച്ച്കൂവി കരയും ശ്വാനവര്‍ഗം

ആണിനും പെണ്ണിനും ഒരിമിച്ചൊരു-
മണ്ണില്‍ക്കിടക്കാമിവിടെ ജീവകണമില്ലാതെ
ആര്‍ജ്ജിതമായതൊന്നും അരച്ചുതിന്നുവാന്‍
മര്‍ത്യനു കഴിയാത്ത മണ്ണിത്

കോലപ്രേതാദികള്‍ കോമരം തുള്ളും
കൊലക്കായ് വാളെടുക്കാതെ
അത്രിജന്‍ മറഞ്ഞ അമാവാസിയില്‍
പിത്തരസം ബാധിച്ചുന്മത്തരായവര്‍

ക്ഷുദ്രമായ് ദ്രവിച്ചു കിടക്കുംജഡങ്ങള്‍ക്കീടയില്‍
ഉദ്യമം മറന്നലയുന്ന ആത്മാക്കള്‍
കരഞ്ഞിടുന്നു പലകോണുകളിരുന്നു-
പരേതമായ വ്യര്‍ഥമോഹങ്ങളൊര്‍ത്ത്.

ഇക്കാഴ്ചകളൊക്കേ കണ്ടു മടുത്തു-
രിക്കുകയണു ഞാനീ  ശിലാവനികയില്‍
ആരൊക്കൊയൊ വന്നു തിരികൊളുത്തി-
ചിരിമറച്ചു മെല്ലെ മന്ത്രിച്ചിടാന്‍-
പണിതതാണിക്കല്ലറ പിരമിഡുകള്‍.

അണിയത്ത് ഈ ഓര്‍മ്മയുടെ ശവപ്പറമ്പില്‍..!!
അണിയത്ത് ഈ ഓര്‍മ്മയുടെ ശവപ്പറമ്പില്‍..!!

Tuesday, 26 June 2012

ഓര്‍മ്മയുടെ മറവികളില്‍












"മറക്കുമോയെന്നെ നീ.. കാഴ്ച്ചയുടെ അഴങ്ങളില്‍
മറക്കുമോയെന്നെ നീ.. മൊഴികളുടെ ഉച്ചത്തില്‍
മറക്കുമോയെന്നെ നീ..  മനസിന്റെ മാറാപ്പുകളില്‍
മറക്കുമോയെന്നെ നീ.. ഓര്‍മ്മയുടെ കൊടുമുടിയില്‍"

നിന്‍ മിഴിനീര്‍കണത്തിനെന്നെ അറിയാതിരുന്നെങ്കില്‍
നിന്‍ കണ്‍പീലി എന്‍നേര്‍ക്കു കൊട്ടിയടഞ്ഞിരുന്നെങ്കില്‍
നിന്‍ കാഴ്ച്ചക്കു  തിമിരം ബാധിച്ചിരുന്നെങ്കില്‍
മറക്കാം- നിനക്കെന്നെ കാഴ്ചയുടെ ആഴങ്ങളില്‍


നിന്‍ ചുണ്ടുകള്‍ നാണിച്ചു വിറച്ചിരുന്നില്ലെങ്കില്‍
നിന്‍ മൊഴികളെനിക്കു കാവ്യഗീതികളല്ലെങ്കില്‍
നിന്‍ മാറ്റൊലികളെന്‍ മുന്നില്‍ മൂകമാരുന്നെങ്കില്‍
മറക്കാം- നിനക്കെന്നെ മൊഴികളുടെ ഉച്ചത്തില്‍

നിന്‍ മാനസകോട്ടയിലെന്നെ ബന്ധിച്ചിരുന്നില്ലെങ്കില്‍
നിന്‍ ഹൃദയത്തുടിപ്പുകളെന്നെ മന്ത്രിച്ചിരുന്നില്ലെങ്കില്‍
നിന്‍ മനസില്‍ ഞാനെന്ന കേടു ബാധിച്ചിരുന്നില്ലെങ്കില്‍
മറക്കാം- നിനക്കെന്നെ മനസിന്റെ മാറാപ്പുകളില്‍

നിന്‍ നിനവിന്‍ ഹസ്തങ്ങളെന്നെ തിരഞ്ഞിരുന്നില്ലെങ്കില്‍
നിന്‍ നീര്‍ച്ചാലുകള്‍തന്‍ ഉറവിടം ഞാനല്ലയെങ്കില്‍
നിന്‍ ഓര്‍മ്മക്കു എന്നെയോര്‍ത്തു മറവിസംഭവിച്ചെങ്കില്‍
മറക്കാം- നിനക്കെന്നെ ഓര്‍മ്മയുടെ കൊടുമുടിയില്‍

Thursday, 21 June 2012

കടത്തുകാരന്‍

ഇരുകര ഇരുപതു തുഴപ്പാടുകൊണ്ടെ-
റിഞ്ഞു തുഴഞ്ഞിടും കടത്തുകാരാ..


ഞാനൊന്നു പുക്കു നിന്റെ തോണിയിതേലും
തുഴഞ്ഞോളൂ തുഴഞ്ഞോളൂ ഞാനുമുണ്ടെ..

തലേക്കേട്ടും കാവിമുണ്ടും നനഞ്ഞിട്ടില്ല
കഴക്കോലും ഊന്തിയിന്നു നില്‍ക്കുന്നിത..


പറഞ്ഞിടും ഇന്നാട്ടിലേ  കഥകളൊക്കെ

കഴുത്തോളം വെള്ളമുണ്ടെന്നുറക്കെപ്പാടും..
 
കൈകള്‍രണ്ടും താളത്തില്‍ തുഴയമര്‍ത്തും
നൗകയിന്നു മറുകര എത്തിച്ചിടാന്‍..


ഒഴുക്കെല്ലാം വെടിപ്പാക്കി പാറിച്ചിടും
കാഴ്ചക്കാര്‍ ഞങ്ങളെല്ലാം കളിപ്പാവകള്‍..

അഞ്ചുപേരുടെ അഞ്ചുരൂപ കടത്തുകാശ്

അഞ്ചുവയറു നിറച്ചിടാന്‍ വഞ്ചിതള്ളുന്നൂ..

നഞ്ചുമില്ല നാണ്യമില്ല അറകളില്‍..
പുഞ്ചിരിച്ചു മൊഞ്ചുകാട്ടി വഞ്ചിതള്ളുന്നു...

Saturday, 16 June 2012

സ്വം

കാറ്റുവന്നണച്ചിടാതെ കാക്കുന്നു-
യെന്നിലെ അണയാത്ത ദീപത്തെയിന്നും
ചകിതനായ് ജീവിതത്തിരയെണ്ണിയീ-
തീരത്തു മണല്‍ത്തരിപുല്‍കിനില്പൂ

ഇന്നെന്‍ ഹൃത്തിനെ രണ്ടായിമുറിച്ചിടാ-
ലെനിക്കൊരു ഭ്രാതാവിനെ പ്രാപ്യമൊ.
കഥകള്‍പറഞ്ഞിരിക്കാനും,കാലം
പാടുന്ന കവിതകള്‍ ഏറ്റുചൊല്ലാനു-
മെനിക്കൊരു ഭ്രാതാവിനെ പ്രാപ്യമൊ.

അമ്പരമുറ്റത്തിനിയുമലങ്കാരമില്ല-
യിന്നെന്‍ മനസും തീരവുമൊരുപോലെ.
അശ്രുകണങ്ങളാല്‍ മറ്റൊരാഴി-
തീര്‍ത്തിടുവനിനി ത്രാണിയുമില്ല

സ്വന്തമെന്തന്നറിയതെ,കേണു-
സോപാനസംഗീതം പാടിയെന്‍ മനസിന്‍-
നട തുറക്കട്ടെ ഞാനിന്നു,ദേവനെ
കണ്ടു കണ്‍പാര്‍ത്തു നിന്നിടട്ടെ.

ഞാനും പിന്നെ ഞാനും മാത്രമായിന്നു-
കൈകള്‍കോര്‍ത്തു ചുറ്റിനടന്നിടാമീ-
സ്വച്ഛന്ദ തീര പ്രദക്ഷിണവഴിയില്‍ -
കുറുകുന്ന പ്രാവുകള്‍ സാക്ഷിയായ്

Monday, 11 June 2012

ജന്മദിനം,ഒരു കുറിപ്പ്

ഒരു ദിനം കൂടി കറുത്തിരുണ്ടു-
കണ്‍ മൂലയിലൊളിക്കാനൊരുങ്ങവെ
തിരികെയൊരു യാത്രയിതസാധ്യമെന്ന-
തോന്നലിലൊരു ജന്മദിനം പോകവെ

പൊഴിഞ്ഞ നക്ഷത്രപ്പൂക്കളെയീ ധരയില്‍-
വെട്ടിക്കീറി തിരഞ്ഞുനോക്കിയൊരു
പുഷ്പവര്‍ഷം നടത്താന്‍, ഒരു
വര്‍ണപ്രതല പ്രതാപ പൊന്നാടയൊരുക്കാന്‍

കഴിഞ്ഞയാത്രയിലെ കാലടി തിരയാന്‍
ഭൂതക്കാണ്ണാടി  ഒരുക്കിയിതെന്‍ ജീവിത-
താളുകളില്‍,ഈ പഴയഗ്രന്ഥങ്ങളില്‍.
എഴുതിവച്ചിരുന്നൂ ഓര്‍മ്മാക്ഷരങ്ങള്‍

അച്ഛ്നോടൊപ്പം..
മ്മയോടൊപ്പം.. നടന്ന-
വഴികളെ നന്ദിയോടെ സ്മരിക്കാമീദിനത്തില്‍
കുറുക്കുവഴികളില്ലതെ കടന്നുപോയ്
ഇക്കാലമത്രയും നേര്‍വഴിമാത്രമായവര്‍ മുന്നിലും

വര്‍ഷം ഒന്നുകൂടി കുറിച്ചിടാമീദിനത്തില്‍
ഒരു പുരാവസ്തുവിന്‍ പിറവിക്കായ്
ദ്രവിച്ചൊടുങ്ങട്ടെ പുത്തന്‍ ജീവിത-
ച്ചൊവയുടെ  കറുത്തക്ലാവുപിടിച്ച്..

Friday, 8 June 2012

മഞ്ചാടി

തിളങ്ങും കണ്ണുകള്‍,ഒരു നിലാപുഞ്ചിരി
അതായിരുന്നെന്‍ ചിറകുമുളക്കും ബാല്യം
എല്ലാം തുടിക്കുന്ന പ്രായം, ആഗ്രഹിക്കും പ്രായം
മനസുകള്‍ തിരിച്ചറിയാത്ത കാലം

വളപ്പൊട്ടുകളായിരം വര്‍ണം വിതറിടും
കുരുന്നിലകളും വിശറിയായ് മാറിടും
വെയിലും നറുനിലാവായ് മാറിടും
ഞങ്ങളാ മരച്ചുവട്ടില്‍ ഇരുന്നിടുമ്പോള്‍

അക്കരക്കരയിലേക്കെന്‍ ബാല്യത്തെ-
വലിച്ചെറിഞ്ഞു, അവിടെത്തളിര്‍ത്തുപുതു-
മഞ്ചാടിമരങ്ങള്‍,പൊഴിഞ്ഞു മഞ്ചാടിമുത്തുകള്‍-

അവിടെ വീണ്ടും പുതുബാല്യങ്ങളുണ്ടാക്കി

വഴിമാറാത്തിരീ നദിയും,പെയ്തുതീരാത്ത മഴകളും
അപ്പൊഴുമീ മഞ്ചാടിമണികളാരെയോ തിരഞ്ഞിരുന്നു
ഒരു പുഞ്ചിരിയെ,ഒരു ബാല്യത്തെ
നിങ്ങള്‍ക്കൊപ്പം ഉല്ലസിച്ചിടുവാനിനി ഞാനില്ലെ??

എല്ലാം പോയ്മറഞ്ഞിടാം..
എല്ലാം എവിടെയൊ പോയ് മറഞ്ഞിടാം..
കമ്പ്യൂട്ടറായ്.. ഇന്റെര്‍നെറ്റായി..
ടെലിവിഷനായ് പോയ് മറഞ്ഞിടാം..

Sunday, 3 June 2012

അപരിചിത

കഥയില്ലാതെയുള്ളോരീ ജീവിതത്തിനു-
കാവലായെത്തിയ തളിരമ്പിളിയൊ നീ
പരിപാലനമായ് പഴയൊരോര്‍മ്മായായ്
ഈ തുലാവര്‍ഷവേളയിളൊരു വിളക്കു വീശി

എന്നെയി നാലുകാലിന്നു മുകളില്‍-
ക്കിടത്തിയിട്ടിന്നു കാലമേറയായ്
ചലനമറ്റയെന്‍ ദേഹത്തിനു ദേഹി-
മാത്രം കൂട്ടായ് കിടക്കുന്നു ഞാന്‍

ആതുരമാം മനവും കായവും
കാലമാംചക്രത്തിലൂടെ ഉരുണ്ടുകളിച്ചിടും
ആ തേര്‍തെളിക്കാനെത്തിയ
വെള്ള പുതച്ചിടും മാലാഖയൊ നീ

അന്ത്യമാം സത്യം തേടിക്കിടക്കുമെന്‍
സ്വപ്നത്തിന്‍ ചിരാതു കൊളുത്തി നീ-
ആരൊക്കെയായ് മാറിയീനിമിഷത്തില്‍-
ഓര്‍ത്തുപോയ് ഞാന്‍ എന്‍ അമ്മയെ

അറിയില്ല നീയാരാണെന്നീ വേളയില്‍
ഏകനാമെന്നിലെ ജീവനെ തൊട്ടുവൊ നീ-
യേകും മരുന്നുകളൊക്കെ ജീവനാഡിയെ-
ത്തലോടി മനസിലെ തൂവല്‍സ്പര്‍ശമായ്

ഇനിയൊരു ജന്മമുണ്ടെങ്കിലെന്‍ മകളാകുമൊ നീ
സ്നേഹം പാടി നടക്കുമെന്‍ ഈണമായിടുമൊ
അടഞ്ഞിടുന്നെന്‍ കണ്ണുകള്‍ നിന്നെ നോക്കി
പോകട്ടെ  ഞാന്‍, ഈ കടപ്പാടുകള്‍ ബാക്കിയായ്

Tuesday, 29 May 2012

വിടപറയും മുന്‍പെ

അടര്‍ന്നുവീണ നിന്‍വാക്കുകള്‍ വീണു തകരാതെ-
കണ്ണീര്‍ താലോലിച്ച  വെമ്പലുകളായ്
തകരുമെന്‍ മനമോടെ  കനിവില്ലാതെ കേട്ടുപോയ്-
കാതില്‍ ഇരമ്പുന്ന ഘോഷമായ്

ഞാന്‍ നിനക്കേകിയ സ്നേഹമാം-
കരുതലിനെ എന്നേക്കുമായൊരു നന്ദിയോതി.
മിഴിയിലെ നാണവും മൊഴിയിലെ മൗനവും
എങ്ങോ അറിയാതെ പോയ് മറഞ്ഞു

അടക്കിപ്പിടിച്ച നിന്‍ സ്നേഹവികാര രാഗങ്ങളെ-
യുടുക്കുകൊട്ടിപ്പാടുവാനിന്നു പാണനാരില്ല.
മഴയില്ല.. കാറ്റില്ല.. നിന്നെത്തലോടുവാന്‍,എങ്കിലു-
മെന്‍ കരങ്ങളെന്തൊ കൊതിച്ചു മടിച്ചിടുന്നു.

പറയല്ലെ നീയെന്നെ സ്നേഹിച്ചിരുന്നില്ലെയെന്നു-
സ്നേഹിച്ചിരുന്നെങ്കിലും പിരിയുകയാണു നാം
ഓര്‍മ്മക്കു ചിറകുള്ള കാലം വരെയും രാഗ-
മേഘവിഹായസിലൂടെ ഏകനായ് പറന്നിടാം

കുറ്റപ്പെടുത്തില്ല നിന്നെ ഞാനെങ്കിലും-
നീ എന്നെ കുത്തിനോവിച്ചിടുക വീണ്ടുമെന്‍-
നോവിന്റെ ആഴങ്ങളില്‍ നിന്നുയരെട്ടെ-
സ്നേഹത്തിന്‍ അഗ്നിപര്‍വതസ്ഫോടനങ്ങള്‍

പെയ്തിറങ്ങുക നീയെന്നില്‍ മഴയായ്-
തോരട്ടെ നിന്‍ കണ്മേഘങ്ങള്‍തന്‍ ദ്യുതിരോഷം
തടയുകയില്ല നിന്നെ ഞാന്‍, ഇറക്കിവക്കുകയെന്‍-
സ്നേഹത്തിന്‍ കയ്പുചുവക്കും വിഴിപ്പുഭാണ്ഡം

കാണാതെ കണ്ടു സ്നേഹിച്ചു നാം..
പറയാതെ പറഞ്ഞു സ്നേഹിച്ചു നാം..
അറിയാതെ അറിഞ്ഞു സ്നേഹിച്ചു നാം,എങ്കിലും-
പിരിയാതെ പിരിഞ്ഞു തളര്‍ന്നു നാം..
പിരിയാതെ പിരിഞ്ഞു പിളര്‍ന്നു നാം..

സ്നേഹമെന്ന ചോദ്യത്തിനുത്തരം തന്നു നീ-
യടുത്തെത്തിയാനാളില്‍ നിഴലിനെ പോലും മറന്നുപോയ്-
ഇന്നാ നിഴലുകള്‍ പോലും നിന്നെ തേടിയീ-
ചുടു നിലാവിലൂടെ എകനായ് ഉഴറിയലയുന്നു..

Wednesday, 23 May 2012

ഗദ്ഗദങ്ങള്‍

ചുവന്ന രക്തക്കടല്‍ ചുറ്റിക്കിടക്കും-
മനമാം മരതകദ്വീപിലുണ്ടൊരു-
പവിഴം കാക്കും മനസ്വിനി, മീട്ടുന്ന-
ശ്രുതികളല്ലോ ഈ ഗദ്ഗദങ്ങള്‍..


മൂകമാം ദ്വീപിനെയുണര്‍ത്തി-
യിവള്‍ തന്‍ കരങ്ങളാല്‍
ലാളന പരിലസിതം കൊടുത്തു-
തന്‍ തംബുരു രാഗധാരയായ്..

ഓര്‍മ്മകളായവള്‍ ശബ്ദലേഖനം ചെയ്തു-
യീ സ്വരതന്ത്രികള്‍ തന്‍ സംഗീതം-
പിന്നയീ മരതകത്തുരുത്തിലെ മായത്ത-
ഉണര്‍ത്തുപാട്ടായ് മുഴങ്ങിടാന്‍.

ആനന്ദ കേളിരവം മുഴക്കിയിവളെപ്പൊഴൊ-
വ്യഥതന്‍ പരിതാപ ശ്രുതിയും തുടുത്തു
ഈ രണ്ടു രാഗവും എന്‍ മിഴികളെ-
യാര്‍ദ്രത തന്‍ ആലേപനം ചാര്‍ത്തി.

ഗദ്ഗദ സംഗീത മഴ ചൊരിയുകയെന്‍-
മാനസസുന്ദരി  ഈ പവിഴം കാക്കുക്ക-
യീ മാനസ ദ്വീപിലെ നാഗമായ്.
സാന്ദ്രമാം സംഗീതമെന്‍ മനസിന്‍-
അടിത്തട്ടിന്‍ ആഴങ്ങളില്‍ ഊളിയിടട്ടെ

Monday, 21 May 2012

വിവാഹം

മുദ്രണം ചെയ്തുനിന്‍ മനസു
എന്‍ ചുവപ്പു മഷികൊണ്ടു.
പതിഞ്ഞതില്‍ തീയതിയും
മറക്കാന്‍ പറ്റാത്ത സ്ഥലവും

നമ്രശിരസ്കയായ് നില്‍ക്കുന്ന നിന്നെ-
കറങ്ങുന്ന ഭൂമിയെ കടിഞ്ഞാ-
ണിടും പോല്‍ പൂത്താലി-
ച്ചരടു കൊണ്ടൊരാണ്‍കെട്ടു കെട്ടി

ഉയരുന്നു കുരവയും പുഷ്പ-
വര്‍ഷവും ശുഭമുഹൂര്‍ത്തത്തില്‍
നിനച്ചുപോയ്  വിവാഹമൊ-
ഈ സ്വര്‍ഗത്തില്‍ വച്ചു തന്നെയൊ

ചുറ്റുമുണ്ടൊരു പത്തായിരം പേര്‍
സാക്ഷിയായ് പൂമാലയും ചാര്‍ത്തി
വെറ്റില വച്ചെനിന്‍ വലംകൈകൊര്‍ത്ത്
പുതുജീവന മണ്ഡലം വലംവച്ചു

മനസിന്‍ പടിവാതിലില്‍ വലം-
കാല്‍ വച്ചു കയറി നീ
നിന്നിലെ എന്നിലും, എന്നിലെ നിന്നിലും
തെളിയുന്ന ദീപമായ് ഈ സംഗമം

Saturday, 19 May 2012

നിലാവിന്‍ നീലിമയില്‍

മന്ദഹാസം തൂകി നില്‍ക്കുമെന്‍-
കാമിനിയാം നിലാവെ..
പടരുന്ന എന്നിലെ ജ്വാലയില്‍-
കുളിര്‍പൊഴിക്കുക..
അന്ധമാം മിഴിയിലെ അന്ധവികാരങ്ങള്‍-
ഒഴുക്കിക്കളയുക.
എന്നിലെ പവിഴ മുല്ലമൊട്ടുകളെ-
തൊട്ടുവിടര്‍ത്തുക
ആ മധുര സുഗന്ധമാസ്വദിച്ചു-
നുകരുക
രാക്കിളിതന്‍ ഒളിപ്പാട്ടിനൊരു
ശ്രുതിമീട്ടി നില്‍ക്കുക
രാവിന്‍ വാര്‍മുടി വരിഞ്ഞുകെട്ടി
വദനപ്രസാദം പരത്തുക
പളുങ്കിന്‍ നീഹാര ബിന്ദുക്കളെ-
ഉണര്‍ത്തിടുക
മന്ദസമീരനെ മലരിന്‍ മണമോടെ-
മാടിവിളിക്കുക
താഴ്വാരത്തിന്‍ പുല്‍ത്തകിട്ടില്‍-
നീല മെത്തവിരിക്കുക
അതില്‍ അഴകില്‍ പുഞ്ചിരി-
മൊട്ടുകള്‍ വിതറുക
ഉഡുക്കളായുള്ളൊരീ ആഭരണങ്ങളും
ഉടയാടയുമെനിക്കേകുക
നയനം നിറയും നമ്രത-നിന്‍
നുണക്കുഴിയില്‍ നിറക്കുക
വരൂ,മരതകമേട്ടിലെ നിലാക്കിളികളായ്
വെള്ളി നീരാളം പുതച്ചിടാം
അര്‍ദ്ര നിലാവെ നിന്‍ നീലിമയിലെന്നെ
ആലിംഗനം കൊണ്ടുമൂടുക
ഒരു നിശാവൃഷ്ടിയായ് ചുംബനമഴ-
എന്നില്‍ പൊഴിച്ചിടുക

നിലാവെ,
അലിയട്ടെ നിന്നില്‍ ഞാന്‍..
തഴുകട്ടെ നിന്നെ ഞാന്‍..
അറിയട്ടെ നിന്ന ഞാന്‍..
പുലരുവോളം മായാതെ നീ..
പോകാതെ നീ.. നിലനില്‍ക്കു എന്നില്‍

Wednesday, 16 May 2012

ഗൃഹാതുരത്വം

നിറഞ്ഞു നില്‍ക്കും സപ്താത്ഭുതങ്ങളുള്ളൊരീ
പാരില്‍,എനിക്കേറ്റവും അത്ഭുതമെന്‍ വീടു തന്നെ!
എനിക്കേറ്റവും പ്രിയമായൊരീയിടം
ഇന്നീ വാനിന്നു കീഴില്‍ വേറെയില്ല!

കിഴക്കിനു പാറാവു നില്‍കുന്ന മാവിന്നു-
ആദ്യസൂര്യകിരണമണിഞ്ഞു നില്‍പ്പൂ..
പ്രഭാതസന്ധ്യയിലൊരു തിരികൊളുത്തിയമ്മ-
യാ ദിനത്തിനൊരു തൊടുകുറിയണിയിച്ചു.
ആ നറുവിളക്കെന്നയുമുണര്‍ത്തി
പിന്നേവരുമുണര്‍ന്നെന്‍ വീടുമുണര്‍ന്നു.

അങ്കണമലങ്കരിച്ചു നില്‍കുന്നി ഉദ്യാനവൃന്ദങ്ങളൊ-
ചുവരിന്നുമ്മ കൊടുത്തുനില്‍ക്കുന്നിതാ!
അവയോരോന്നും പരസ്പരം- രഹസ്യ-
കുശലങ്ങളോതി  നില്‍ക്കുന്നിതാ

മധുരാരവങ്ങളുയര്‍ത്തി കിളിക്കൊഞ്ചലും,
തുഷാരബിന്ദുക്കള്‍ പൊഴിഞ്ഞൊരി പുല്‍ചെടികളും,
വാക്കിനൊരു മറുവാക്കു ചൊല്ലുന്ന കളിത്തത്തയും,
ക്ഷീണം സടകുടഞ്ഞു കളഞ്ഞൊരി അരുമകൗലേയവും,
തൊഴുത്തില്‍ ക്ഷീരം ചുരത്തിനില്‍ക്കുന്ന ശൃംഗിണിയു-
മെല്ലാംമെന്‍ മധുരഭവനത്തിന്‍ മനോജ്മമല്ലൊ

അഞ്ചു പടിയുള്ളരീ പടിക്കെട്ടും പിന്നെ-
യുണ്ടൊരി നടവഴിയും  ചേര്‍ന്നെന്‍ മുറ്റമൊരുക്കി-
യാ മണീമുറ്റത്തുള്ളൊരാ ചെന്തെങ്ങിലെന്തു കരിക്കു-
കുലകള്‍ തിങ്ങി നില്‍ക്കുന്നിതാ,
തൊടിയിലെ പ്ലാവും മറ്റു തരുക്കളുമൊരു-
തണല്‍പ്പന്തലൊരുക്കി നില്‍ക്കുന്നിതാ
തണ്ണീര്‍ക്കുടമായൊരി മുറ്റത്തെ ചെപ്പിലെ-
ത്തുള്ളികള്‍ ഓളങ്ങളുണ്ടാക്കിക്കളിച്ചുടുന്നു

തിരുസന്ധ്യയടുത്താലോ തിരു നിലവിള-
ക്കേന്തിനില്‍ക്കുമെന്‍ കുഞ്ഞുപെങ്ങളും
തൊഴുകയ്യാലെ നില്‍കുമെന്നനുജനുംഞാനും
പിന്നെയുതിരുന്നു ഏവൊരുമൊത്തുള്ള നാമജപങ്ങളും

വാദ്യഘോഷങ്ങളില്ലാതെ ശാന്തമായ് ചിരിക്കുന്നെന്‍ വീട്,
അമ്മയുമച്ഛ്നും സ്നേഹം ചൊരിഞ്ഞിടുമീ സ്നേഹ-
ഗൃഹത്തിലോണം വിരുന്നെത്തും പൂക്കളമൊരുക്കീ,
സദ്യയൊരുക്കീ  ഓരൊ ദിവസവും

ഇന്നെനിക്കേറ്റവും പ്രിയമായൊരീയിടം
ഇന്നീ വാനിന്നു കീഴില്‍ വേറെയില്ല..!!

Friday, 11 May 2012

മകള്‍

മണിനാലായിന്നീ  വിദ്യാലയമങ്കണ-
മൊഴിഞ്ഞിടാം,എന്‍ മകളും തിരിച്ചിടാം

പൂമ്പാറ്റച്ചിറകുള്ള എന്‍ മലരിന്മലരെ
നിന്‍ വരവും കാത്തിരിപ്പൂ ഞാന്‍

കാണുന്നു നിന്നെ ഉള്‍ക്കണ്ണാലൊരു കുളിരു-
കോരി, ഈ നിറഭേതങ്ങള്‍ക്കപ്പുറം

വര്‍ഷമേഘത്തോടു മെല്ലെയരുളിയീ-
ഭൂമിതന്‍ വാടിയിപ്പോള്‍ നനച്ചിടല്ലെ

സ്വര്‍ണ്ണകിരണമേ നിന്‍ നിര്‍മലതമാത്ര-
മെന്‍ അഴകിന്‍ തളിരില്‍ ചൊരിയേണമെ

ഇളംതെന്നലെ നീയിന്നെന്‍ മകള്‍ക്കു-
ഇളംകുളിരേകി കൂടെവരേണമെ

മാതാവിന്മതാവെയെന്‍ കുഞ്ഞിന്‍പാദങ്ങളില്‍
മുള്ളു തറച്ചിടാതെ പച്ചമെത്തവിരിച്ചിടണെ

ഗാനകോകിലമെ നിന്‍ നിലക്കാത്ത കൂജന-
മവള്‍ സംഗീതമായേറ്റുപാടിടണമെ

നാലുമണിപ്പൂവെ നീ ഉണരാറായെങ്കിലെന്‍
കണ്മണിയില്‍ പുഞ്ചിരി വിടര്‍ത്തിടുമോ

തെല്ലുമൊരു കണ്ണീര്‍ തൂകാതെയിന്നെന്‍
കടിഞ്ഞൂല്‍ മണിയെന്‍ ചാരെത്തണഞ്ഞിടണെ

കാത്തിരുക്കുന്നീ അമ്മ  കണ്ണിമചിമ്മാതെയെന്‍
പൊന്നോമനയാം മകളുടെ വരവുംകാത്ത്

വേഗമണഞ്ഞിടുക പൊന്നെയിന്നെന്‍
മാതൃത്വമിവിടെയുരുകി വീഴാതെ

Wednesday, 9 May 2012

മറുമൊഴി

എന്തിനും വാചാലമാകുമെന്‍ മിഴികള്‍
നിന്‍ മൊഴിക്കു മറുമൊഴിയേകാനാകതെ
പീലികള്‍ കോര്‍ത്തു തടയണ പണിതിട്ടു.
എങ്കിലും! തുടിക്കുന്ന ഗംഗാ പ്രവാഹമാ-
യൊഴുകി  കണ്ണീര്‍ സ്വയം ചാലുകള്‍ തീര്‍ത്ത്

അന്നെന്‍ നാവുഴറാതിരുന്നെങ്കില്‍..
അന്നെന്‍ കണ്ണുകള്‍ മൂകമല്ലാതിരുന്നെങ്കിലോമനെ
നിന്‍ പാവനമാമുടലീ തീരത്തടിഞ്ഞിടുമോ?
ആരും തൊട്ടുനോവിക്കാത്തൊരീ
അഴകുടലല്‍ മീന്‍കൊത്തേറ്റുനീറിക്കിടക്കുന്നൂ

ഹാ!!! സഹിക്കവയ്യാ!!!
ഹാ!!! സഹിക്കവയ്യാ!!!

എന്നെ തഴുകാന്‍ കൊതിച്ചൊരി മുടിയിഴകള്‍
ഉപ്പുപിടിച്ചിരു പറ്റമായ് കിടക്കുന്നു..!!
കരിമിഴിക്കണ്ണുകള്‍ കാരണഭൂതനെ-
മറന്നു അലസമായ് നോക്കിക്കിടക്കുന്നിതാ..
തൊടുകുറി മാഞ്ഞൊരീ ഫാലത്തിലിന്നു-
മണല്‍ത്തരി നിറകോലം വരച്ചുട്ടു..
അധരങ്ങളെന്തോ മൊഴിയുവാന്‍ മറന്നപോലെ..!!

നിന്‍ ചാരത്തു ചേര്‍ന്നോന്നു കിടക്കട്ടെ ഞാന്‍..?
നിന്‍ ചാരത്തു ചേര്‍ന്നോന്നു കിടക്കട്ടെ ഞാന്‍..?

കദനം നിറഞ്ഞ എന്‍ മൊഴികള്‍
നിനക്കു പകര്‍ന്നിടട്ടെ..!!!
കദനം നിറഞ്ഞ എന്‍ മൊഴികള്‍
നിനക്കു പകര്‍ന്നിടട്ടെ..!!!

എല്ലാ കദനങ്ങള്‍ക്കും മീതയാണീക്കദനമെന്നു-
ഞാന്‍ ഉറക്കെ രഹസ്യം പറഞ്ഞിടട്ടെ..!!

എന്‍ സിരകള്‍ താപമരിക്കുന്നു..
എന്‍ ഹൃദയത്തുടിപ്പുകള്‍
ചെണ്ടമേളങ്ങളുയര്‍ത്തുന്നൂ...!!!
മജ്ജകള്‍ തണുപ്പിന്നു കാവലായ് മാറുന്നു
കടല്‍ നുരകളെന്നെ വരിഞ്ഞുമുറുക്കുന്നു.
ഈ കണ്ണീരിന്‍ ഗംഗാപ്രവാഹം നിലക്കുന്നു
ഈ ഹൃദയദ്രുദതാളം നിലക്കുന്നൂ
മരവിപ്പു മാത്രം..!!മരവിപ്പു മാത്രം.. !! ഞാന്‍ അറിയുന്നു

എന്‍ ചിത്രകൂടത്തിലെ ശലഭവും പറന്നുപോയ്..!!
നിന്നെ തേടി.. എന്‍ ഇണയെ തേടി.. പറന്നുപോയ്!!


എന്‍ മറുമൊഴിയായ് ഈ ശലഭത്തെ നീ
സ്വീകരിച്ചാലും എന്‍ ഓമനെ!!

എന്‍ മറുമൊഴിയായ് ഈ ശലഭത്തെ നീ
സ്വീകരിച്ചാലും എന്‍ ഓമനെ!!

Saturday, 5 May 2012

വേദന

മനസിന്‍ പിന്‍വാതിലിലൂടെ ഒളിവിന്‍-
നോട്ടവുമായ് നില്‍ക്കുന്നീ വേദന..
തക്കം പാര്‍ത്തിരിക്കുന്നീ നോവിന്‍-
അമ്പുകള്‍ തൊടുക്കാന്‍

സുഖ-ദു:ഖ രണഭൂവാം മനസില്‍..
സുഖ-ദു:ഖ രണഭൂവാം മനസില്‍..
ഏകനായ് സ്നേഹായുധം
കൊണ്ടിന്നു യുദ്ധം നടത്തുന്നു ഞാന്‍
പോരാളിയല്ല ഞാന്‍..
പോരാളിയല്ല ഞാന്‍ മമ-
ഹൃദയം മുറിച്ചു നല്‍കുമൊരുമേകലവ്യന്‍!!

ഇന്നു ഞാന്‍ നിരായുധനീ ഭൂവില്‍..
ഇന്നു ഞാന്‍ നിരായുധനീ ഭൂവില്‍..
എങ്കിലും ഒളിയംബുകള്‍..
എങ്കിലും ഒളിയംബുകള്‍ മാത്രം..
എങ്ങുനിന്നോ ഗഗനം മുറിച്ചെത്തിടും.

ഉന്നമതില്‍ത്തന്നെ കുറിച്ചു വച്ച-
ബ്രഹ്മാസ്ത്രമാണതെന്നു നിശ്ചയം!!
ഉന്നമതില്‍ത്തന്നെ കുറിച്ചു വച്ച-
ബ്രഹ്മാസ്ത്രമാണതെന്നു നിശ്ചയം!!
തടുക്കുവാന്‍ എന്‍ കയ്യില്‍ പരിചയുമില്ല!!
തറച്ചിടുമതു ഒത്ത നടുവില്‍ തന്നെ..

എന്‍ കൂടെയില്ല പവനതനയന്‍..
എന്‍ കൂടെയില്ല പവനതനയന്‍..
എന്‍ കൂടെയില്ല സപ്താവതാരപുരുഷന്‍..
എന്‍ കൂടെയില്ല സപ്താവതാരപുരുഷന്‍..
എങ്കിലുമൊരു മൃതസഞ്ചീവനി തേടി
എങ്ങോ നോക്കിക്കിടപ്പു ഞാന്‍!!!

Tuesday, 1 May 2012

പ്രണയം

പ്രിയേ,എനിക്കു  കാണുവാന്‍ കഴിയുന്നില്ല
കാരണം ഞാന്‍ നിന്നെ മാത്രം കാണുന്നു.

പ്രിയേ,എനിക്കു മൊഴിയുവാന്‍ കഴിയുന്നില്ല
കാരണം എന്റെ മൊഴികള്‍ നിനക്കു മാത്രം

പ്രിയേ,എനിക്കു കേള്‍ക്കുവാന്‍ കഴിയുന്നില്ല
കാരണം നിന്‍ സ്വരം മാത്രമെന്‍ കാതില്‍

പ്രിയേ,എനിക്കു ഗന്ധമറിയുന്നില്ല
കാരണം നിന്‍ സുഗന്ധം മാത്രം ഞാന്‍ അറിയുന്നു.

പ്രിയേ,എനിക്കു ചിന്തകള്‍ ഇല്ല
കാരണം എന്റെ ചിന്തകള്‍ നീയാണു.

പ്രിയേ,എനിക്കു നടക്കുവാന്‍ കഴിയുന്നില്ല
കാരണം ഞാന്‍ നിന്നൊടൊപ്പം നടന്നീടുന്നു.

പ്രിയേ,എനിക്കു ഓര്‍മ്മകള്‍ ഇല്ല
കാരണം നിന്‍ ഓര്‍മ്മകള്‍ എന്നില്‍ നിറഞ്ഞിടുന്നു.

പ്രിയേ,എനിക്കു ചുംബനമേകാനറിയില്ല
കാരണം ഞാന്‍ നിന്നെ മാത്രം ചുംബിച്ചിടുന്നു.

പ്രിയേ,എന്റെ കൈകള്‍ നിശ്ചലം
കാരണം  എന്‍ കൈകള്‍ നിന്നെപ്പുണര്‍ന്നിടുന്നു.

പ്രിയേ,എനിക്കു സ്നേഹിക്കുവാന്‍ കഴിയുന്നില്ല
കാരണം ഞാന്‍ നിന്നെ മാത്രം സ്നേഹിക്കുന്നു.

Friday, 27 April 2012

ബന്ധങ്ങള്‍

ചങ്ങലക്കൊളുത്തായി ചുറ്റിക്കിടക്കുന്നീ-
ബന്ധങ്ങളോരോന്നും
ചാലകമായൊരീ കണ്ണികള്‍ ചാരെയിരുന്നു
കാണാപ്പുറങ്ങള്‍ തിരയുന്നു
ഇവയൊന്നു ചേര്‍ന്നിരിക്കുന്നതോയി

ബന്ധം, അതൊ ഇതു ബന്ധനമോ

സ്നേഹത്തിന്‍ ആലയിലുരുക്കി
ഒരുക്കിയ അച്ചിലെ കണ്ണിയാണോയിത്
അതൊ,കാറ്റത്തുലഞ്ഞു നിന്നൊരാ വള്ളിയിലെ-
തോരണ വര്‍ണ്ണ പത്രങ്ങളോ

ഈ ബന്ധങ്ങളേല്ലാം പേരോതി വിളിച്ചു നാം
ഹൃദയത്തിന്‍ കണ്ണിയില്‍ കോര്‍ത്തിടുംബോള്‍
അറിയാതെയൊന്നീ കണ്ണിയകന്നാല്‍
നീറും തുരുംബു കഷ്ണമായ് മാറുമെന്‍ മനം

കാണാമറയത്തിരുന്നു കാണുന്നതും
നിശ്വാസമായരികിലെത്തുന്നതും
കരമൊന്നു ചേര്‍ന്നു നെഞ്ചോടണയുന്നതും
അധരങ്ങളലിയുന്നതും ഈ ചങ്ങലക്കുരുക്കില്‍

മണ്ണിലെ പച്ചയാം മനുഷ്യര്‍ നാം
പരസ്പരം മനസെന്ന കണ്ണിയില്‍കോര്‍ത്തീ-
സ്നേഹച്ചങ്ങല തീര്‍ത്തു നല്‍കാം
സ്നേഹംനിറഞ്ഞൊരി ബന്ധത്തിനു
പേരില്ല പെരുമയില്ല 


Thursday, 19 April 2012

ചുവര്‍ചിത്രം

എന്‍ ഗൃഹത്തിന്‍ മുന്‍വാതിലിന്നരികിലായ്
ചുവരിന്നു മനോഹാരിതയേകാന്‍
തൂങ്ങിനില്‍ക്കും ചുവന്ന-
റോസാപുഷ്പം നിറഞ്ഞ ചിത്രം

ചിന്തയിലാണ്ടു വിടരാന്‍ മറന്നു-
പോയൊരീ പൂവിന്‍ ദളങ്ങളില്‍
അറിയാതെ പതിഞ്ഞുനിന്നൊരീ മഞ്ഞുതുള്ളി-
യേതോ രഹസ്യം മൊഴിയും പോലെ.

നീലനിറം വിതാനിച്ചൊരീ
ആകാശപ്പരപ്പിലേകയായ് നിന്നൊരീ
കന്യകയാം സുന്ദരിപ്പൂവിന്‍
ഇതള്‍ സ്പര്‍ശമേല്‍ക്കാന്‍ കൊതിച്ചു-
ശലഭങ്ങളോരോന്നു പറന്നടുക്കവെ

പടര്‍ന്നൊരീ വള്ളിപ്പടര്‍പ്പിന്‍ മുള്ളുകള്‍
തറക്കാതെ മൂടി നില്‍ക്കുന്നൊരീയിലകളും
മാതൃത്വമെന്തെന്നറിഞ്ഞൊരീ ഇളംതണ്ടിന്നഗ്രത്തായ്
തെന്നലേറ്റു അസ്വാദനം പൂണ്ടുനില്‍പ്പൂ

ഇന്നെന്റെ കല്പനയില്‍ ജീവന്‍ തുടിച്ചൊരീ-
ചിത്രമെന്നും കണ്ണിലൊപ്പിയെ-
ഞാന്‍ പടിയിറങ്ങൂ-കാരണം, 

ഈ കാഴ്ച്ചയെനിക്കന്യമാണീ മഹാനഗരത്തില്‍

Wednesday, 18 April 2012

അകത്താളുകള്‍

അനന്തമായൊരീ പുസ്തകത്താളുകള്‍
ഇവയെല്ലാമൊരമ്മതന്‍ മക്കളല്ലോ
ജനിപ്പിച്ചതിന്നു സര്‍ഗശക്തിയുടെ-
ബീജമാം മഷിത്തുള്ളികള്‍

വടിവൊത്തതൊ, ചിലതു മടങ്ങിയതൊ
അതൊ കീറിയതോ,എല്ലാം 
കറുത്തക്ഷരങ്ങള്‍ പതിഞ്ഞ
പഴമ മണക്കുന്ന പുത്തനാം പുരാവസ്തുക്കള്‍

മറയാത്ത സംസ്കാരമാണതിന്‍ സത്യം
അലിയാത്ത പൈതൃകമാണതിന്‍ പുണ്യം
തോരാത്ത തപസ്യയാണതിന്‍ ഭാവം
നേരിന്‍ വെളിച്ചവുമേകുവാനാണതിന്‍ ധര്‍മ്മം

എന്‍ വിരലുകള്‍ തലോടി മറയുന്നതാളിലെ
അംബുകളാണതിന്‍ അക്ഷരങ്ങള്‍, എന്‍
ഹൃത്തില്‍ പാഞ്ഞു തറച്ചുപോയ്, നിണഭരിതമായ്
ആ രക്തമിന്നെന്‍ മഷിത്തണ്ടു നിറക്കുന്നുവോ -
പുതിയ താളുകള്‍ക്കായ്

Thursday, 12 April 2012

അത്താഴം

മഴ പെയ്തുതോര്‍ന്നൊരീ യാമത്തില്‍
ഇരുള്‍ വീണ ഓലപ്പുരതന്‍ ഉമ്മറപ്പടിയിലവള്‍
തണുപ്പിന്‍ വിറയിലോടെ
കണ്ണുനട്ടിരുന്നു, ആരെയോ കാത്തിരുന്നു

ചാരെയിരുന്നു കരഞ്ഞ പൈതലിന്‍
വായൊന്നുപൂട്ടാനവള്‍ക്കായില്ല
ഒട്ടിയ വയറുമായ് ഓരത്തിരുന്നൊരീ-
യുണ്ണിടെ കണ്ണിലെ കണ്ണീരുവറ്റിയുറങ്ങി

റാന്തല്‍ വിളക്കു തിരിതാഴ്ത്താന്‍
മടിക്കുന്നു നിനക്കുവേണ്ടി
മുടിക്കെട്ടും അരക്കെട്ടുമൊരുപോലെ-

മുറുക്കീ നീ പിന്നെയും കാത്തിരുന്നു

അന്നമില്ല!! ഈ അല്ലലുമായവള്‍
അഴലിലുഴറി നീറുന്നു.

വെറുമൊരു പഥികനല്ലവളുടെ കാന്തന്‍
അവര്‍ക്കായ് കരുതുമൊരു പാഥേയ-
മെന്നുമീ  ഭാണ്ഡത്തിനുള്ളില്‍
അതാണാക്കാത്തിരിപ്പിന്‍ അര്‍ത്ഥം

ഇരുളിനെ ഭേദിച്ചവനെത്തുമെന്നോര്‍ത്തി-
രിപ്പൂ അവള്‍ പതിവായ്
എന്നുമീ അത്താഴവിരുന്നേകിയെ
അവനുറങ്ങാറുള്ളീപ്പുരക്കീഴില്‍

പതിവുതെറ്റാതെയണഞ്ഞു അവന്‍-
തന്‍ പൈതലിനെ വരിയെടുത്തു
ചുംബനമേകിയാ നിദ്രഭേദിച്ചു-
തരളമാം മാറോടണക്കവെ

ഭാണ്ഡമഴിച്ചവള്‍ മൂന്നായ് പകുത്തീ
പാഥേയം,തന്‍ കുഞ്ഞിനുമേറ്റവും നല്‍കി
ഒരു പിടിച്ചോറുരുട്ടി കുഞ്ഞിന്‍ വായില്‍ പകരവെ
തന്‍ കണ്‍തടങ്ങളും ആര്‍ദ്രമായ്
അവളുടെ മുഖത്തെ ചന്ദ്രോദയം
സാക്ഷിയായ് അവന്റെ പങ്കും കഴിച്ചു

"ആരുണ്ടറിയുന്നീ പൊതിച്ചോറില്‍
ഉറഞ്ഞൊരി പാഷാണ തല്പം"

അവനേകിയ വിഷാംശം കഴിച്ചവശയായ്
അവര്‍ വിറയാര്‍ന്നു വീഴവെ
കണ്‍കൂംബി കിടന്നൊരാ പൈതലില്‍
ചുണ്ടില്‍ മറായാതെയെന്നുമീ പാല്പ്പുഞ്ചിരി

അന്തിയുറങ്ങും മുന്‍പ് കഴിക്കുന്നതാണത്താഴം
ഇന്നീ അത്താഴമൊ കഴിച്ചു മൂവരും
എന്നേക്കുമായുറങ്ങാന്‍..!!!
എന്തിനെന്നറിയില്ല??? ഈ ചോദ്യവുമെന്‍ മനസില്‍ കിടപ്പൂ.!!!

Wednesday, 4 April 2012

ഓര്‍മ്മയില്‍ പ്രിയസഖീ

ഇലപ്പൂക്കള്‍ പൊഴിഞ്ഞൊരീ-
ജീവിതസായാഹ്നത്തിലിന്നു-
ഞാന്‍ തനിയെ നടന്നുനീങ്ങവെ
അടിതെറ്റി വീഴാതെയെന്നെ-
കാത്തൊരീ  മധുരമാം ഒര്‍മകള്‍

"
കാര്‍ത്തിക വിളക്കിന്നരികില്‍ തെളിഞ്ഞൊരാ-
മുഖമെന്‍ മനസില്‍ തിരിതെളിയിച്ച നാള്‍
ഒരു ജന്മസുകൃതമായ് അണിയിച്ച താലിയു-
മായ് സഖിയെന്‍ വാമഭാഗം ചേര്‍ന്നൊരാ വേളയില്‍

പിന്നെയോരൊ ദിനങ്ങളും പോരാതെ-
വന്നുനിന്‍ പ്രേമത്തിന്‍ ആഴത്തിലെത്താന്‍
മനസില്‍കുറുകിയ കിന്നരിപ്രാവിന്റെ
മധുരസ്വരങ്ങളെന്‍ ജീവിതതാളമായ്

 സ്നേഹം നിറഞ്ഞ അക്ഷയ പാത്രമാണെന്‍-
സഖി പകര്‍ന്നോരൊ അമൃതകണങ്ങളും
ബാക്കിവച്ചെപ്പൊഴൊ യാത്രയായെന്‍
വാമഭാഗവും ശൂന്യമായ് "

ഇന്നെന്റെ യാത്രയിലിടറുന്ന
കാലടി കാക്കുവാനരുമില്ല
കൂട്ടായുണ്ടൊരീ ഓര്‍മ്മതന്‍ ഊന്നുവടിയുമായ്
നിന്നിലേക്കെത്തുവാന്‍ യാത്ര തുടരുന്നു..
http://www.youtube.com/watch?v=Q_OfYhEWKak

Monday, 26 March 2012

മഴത്തുള്ളിയുടെ പുനര്‍ജന്മം

ആകാശനീലിമയിലെ സുന്ദരി-
യാകാന്‍ കൊതിച്ചൊരി വിണ്മേഘമിന്നു-
കാര്‍മുകിലായ് മാറിയേതോ-
കര്‍ക്കിടക രാവിന്‍ പേറ്റുനോവുമായ്

അമ്മയിന്നു ഗര്‍ഭം ധരിച്ചൊരീ മഴകണം
ജന്മം കാത്തിരിപ്പായീരാവില്‍
സൃഷ്ടികര്‍ത്താവിന്നനുഗ്രഹിച്ചൊരീ നേരത്ത്
പുഷ്ടിയാമൊരു നീര്‍ബിന്ദുവിന്നുജാതമായ്

അടര്‍ന്നുപോയൊരീ തുള്ളിയിന്നു പുക്കിള്‍-
ക്കൊടി ബന്ധമില്ലാതെയൊന്നുകാണാതെ
ക്ഷണികമായൊരീ യാത്രയിലിന്നുകൂട്ടായ്
കണികകള്‍ ഒരോന്നുവന്നുചേരവെ

മിന്നല്‍ പ്രകാശത്തിന്നഴകില്‍
കനല്‍ പോലെതെളിഞ്ഞൊരീമുത്ത്
ഭൂമിതന്‍ മാറോട്ചേരവെ
മമജീവനിന്നണഞ്ഞു പുതുജീവനേകാന്‍

പ്രയാണമായേതോ സാഗരമാം സ്മശാന-
മായൊരീ നീര്‍പരപ്പില്‍
താതനിന്നുദിച്ചുണര്‍ന്നീ പഞ്ചാശ്വത്തിനൊപ്പം
കാത്തിരുന്നീക്കണം മറ്റൊരുപുനര്‍ജന്മത്തിനായ്

Tuesday, 20 March 2012

ജനാലകള്‍ തുറക്കുംബോള്‍

ഇരുള്‍ നിറഞ്ഞൊരീ മൂകമാം മുറിയിലെന്‍
നിഴലിനെ തേടിയലഞ്ഞുപോകവെ
കണ്ണില്‍നിറഞ്ഞൊരി കറുപ്പെന്നേ-
മറ്റൊരു ഗാന്ധാരിയാക്കിയൊ


കുത്തഴിഞ്ഞൊരിമുടിയുമായ് ഞാന്‍-
കുത്തിയിരുന്നീ മുറിക്കോണില്‍
കണ്ണീര്‍ക്കണങ്ങളുമിരുട്ടിലലിഞ്ഞുപോയ്-
നിറമറിയാതെ
ഒരു നുറുങ്ങുവെട്ടവുമെനിക്കേകാന്‍ മറന്നു-
പൊയൊരീ മിന്നാമിന്നികള്‍
അലയുന്നുഞാനീ കൂട്ടിലൊരു
പ്രകാശകിരണത്തിന്‍ നേര്‍രേഖയെ


അടഞ്ഞൊരീ ജനാലയിലൂടൊരു നേര്‍ത്ത-
വെളിച്ചം  കണ്ടുവെങ്കില്‍
ആര്‍ക്കും തുറക്കാത്തൊരീപ്പൂട്ടിന്‍
അഴികള്‍ താനെതുറന്നുവെങ്കില്‍
ജലകണമില്ലാത്തൊരീ ശരീരമിന്നു
പാഴ്ത്തടിയായ് ഇരുട്ടില്‍ വീഴവെ-
യേതൊ പ്രകാശരൂപന്‍ എന്നെ കൊണ്ടു-
പോകാനെന്നിലേക്കണയവെ
കേട്ടുഞാന്‍ ജാനാലകള്‍ തുറക്കുന്ന ശബ്ദം
കണ്ടുഞാനാ പ്രാകാശരൂപനെ സുസ്മേരവാദനനായീ-
കൊടുംതപസ്സിന്നൊടുവില്‍                                       [ക്യാന്‍സര്‍രോഗികളുടെ സ്മര ണക്ക്..                                                 

Tuesday, 13 March 2012

മരത്തണലുകള്‍

തണലെന്ന വിരിമാറില്‍ ചായുവാനായ്
നടുവൊത്ത ചില്ലയില്‍ ഊഞ്ഞല്‍ കെട്ടാന്‍
കിളികള്‍ക്കു കൂട്ടായ് മാറുവാനായ്
തളിരോടെ ഞാന്‍ ഒരു മരവുംവച്ചു

വളര്‍ന്നു ഞാന്‍ അറിയാതെ നിന്നോടൊപ്പം
പടര്‍ന്നു നിന്‍ തണലുമെന്‍ മണിമുറ്റത്ത്
തുള്ളിക്കളിച്ചു എന്‍ പിള്ളകളവിടെ-
നീതന്ന മാമ്പഴവുമാസ്വദിപ്പൂ

എന്‍ പ്രിയതമയൊന്നുമെ സ്നേഹിച്ചുപോയ് നിന്നെ-
പ്പരിപാലിച്ചു വളര്‍ത്തിയൊരരുമയായ്
രാത്രിയിലാകവെ മാമ്പൂമണം പുതച്ചു-
ഞാനെന്‍ പത്നിയെപ്പുണര്‍ന്നുപോയ്

കയ്യിലൊരു വടിവന്നുചേരവെയെന്‍-
മുടിയാകെ വെള്ള പുതക്കുംബോളും
നീയും നിന്‍ തണലും എനിക്കാശ്വാസമായ്
എനിക്കൊരു മധുരനൊംബരക്കാറ്റായ്

മരണക്കിടക്കയില്‍ഞാന്‍ മെല്ലെ കണ്‍തുറന്നു-
നോക്കുമ്പോളും നീ വീശിക്കൊണ്ടിരിക്കുന്നു
അങ്കലാപ്പായെന്‍ മനമിതോര്‍ത്തു
എനിക്കൊപ്പമിന്നു ചിതക്കായ് ബലിയാകുന്നതു നീയൊ...!!!!

Saturday, 3 March 2012

എന്റെ സ്വകാര്യം

എന്റെ മാത്രമായ് ഓര്‍ത്തുവച്ചൊരീ
മുഖപ്രസാദമഴകെ എന്‍ മലരെ
ഇഷ്ട്മാണെങ്കിലും സഖീ ഞാനിതുവരെ-
യൊന്നുമോതീല്ല ചെമ്മെ

ഓരൊ പുലരിയും ജനിച്ചു നിന്നെക്കാണുവാന്‍
വെയില്‍നാളമണയുമ്പോളും നിറഞ്ഞൊരീ
പുഞ്ചിരിയുമായ് ഞാന്‍ ചാരവെ
നിറഞ്ഞുനിന്നീ വിണ്‍മുഖവുമോരൊ കനവിലും

വഴിയരികില്‍ നീ നടക്കും പാതയോരത്തു
കാത്തിരുന്നു നിന്നോടെന്തൊ ഓതുവാനായ്
എന്നിട്ടും പറയാന്‍ കഴിഞ്ഞില്ലെന്‍
വാക്കുകള്‍ മറനീക്കി വന്നീല്ലാ

കടന്നുപോയോരൊ ദിനങ്ങളും,നിന്നെ-
ധ്യാനിച്ച സമാന്തര രേണുവായ്
അറിഞ്ഞിരിക്കുമോ നീയെന്നുള്ളില്‍
അലയടിക്കും തിരപോലെയുള്ളൊരീ പ്രണയനൊമ്പരം

നീയറിയാതെ നിന്നെയറിയാന്‍ ശ്രമിച്ചൊരീ സ്നേഹം
കാറ്ററിയാതെ മഴയറിയാതെ വെയിലറിയാതെ
കാത്തുവച്ചൊരീ സ്നേഹം
എന്നുമെന്റെയീ സ്വകാര്യസ്വത്തല്ലയോ..

നിശബ്ദം ഒരു വിരഹം

സന്ധ്യമായും നേരം, രാവിന്‍-
ഗന്ധമണയും നേരം
കാത്തിരുന്നു നിന്‍ ശബ്ദവീചികളെ-
യീ,തത്തകൊഞ്ചല്‍ പോലെ

തിരിയണഞു നിന്നൊരാ വിളക്കി-
നരികെ നിന്നും ഞാനകലവെ.
തിരികെവരാന്‍ കൊതിക്കുമ്പൊളും
തിരികെനോക്കുവനെന്‍ അയനമനുവദിച്ചീലാ

എത്രരാത്രികളിലെന്‍ മനസിലെ
നേത്രതന്തുവിനെയുണര്‍ത്തി നീ-
രചിച്ച മധുര സ്നേഹഗാനമിന്നു-
വാചാലമാകുവാന്‍  മാത്രമായ്

അടര്‍ന്നു വീണൊരീ മുന്തിരിമുത്തിനെ
പടര്‍ന്ന വള്ളിയില്‍ ചേര്‍ത്തുവച്ചിടുമൊ
ക്ഷാമമില്ലെന്നും നിന്‍ കണ്ണീര്‍ത്തുള്ളിക്കു
സമമെന്‍ മനസുമെരിയുന്നീച്ചിതയില്‍

വീണ്ടും മുഴങ്ങീടുമോ നിന്‍ മണിനാദം
വണ്ടിനെ പോലെയെന്‍ ചെവിയില്‍ മൂളീടുമോ
മറക്കാന്‍ കഴിയാത്തൊരോര്‍മ്മയായ്
തറച്ചുപോയ് നിന്‍ സ്നേഹശബ്ദവീചികളെന്നില്‍

ചെറു പുഞ്ചിരി

ആടിക്കളിക്കാം നമുക്കീ 
ആവണിക്കാലത്ത്

തുള്ളിക്കളിക്കാം 

നമുക്കീ മഴക്കാലത്ത്

ഏന്നുമോര്‍ക്കും 

കഥകള്‍ പറഞ്ഞീരിക്കാം
നമുക്കീ തണല്‍-

മരങ്ങളില്‍..

കണ്ണാരം പൊത്തിക്കളിച്ചീടാം
കാതോരം പാട്ടുകള്‍ 

പാടി നടന്നീടാം

പിന്നെയോരോ കായ്മണികള്‍ 

പറുക്കി നടന്നീടാം

എന്നുമോര്‍ക്കും മധുരമീക്കാലം..

കല്പടവുകള്‍


എന്റെ ഏകാന്തതയിലെ 
പുണ്യമല്ലെ നീ..
ഏകനായ് ഞാന്‍ തേടും 
സത്യമല്ലെ നീ

എന്‍ എകാന്തത- 
വാചലമാകുന്നു
നിന്‍ സത്യത്തെ 
അംഗീകരിക്കുമ്പോള്‍

നിനക്കായ് കാത്തിരുന്നു 
ഈ പടവില്‍ ഒരു
നറു നിലാവയ് നീ വരുമൊ

നിന്‍ അരികില്‍ വരാന്‍ 
കൊതിച്ചു ഞാന്‍
ഈ പടവില്‍ ചേര്‍ന്നിരിക്കാന്‍  
മോഹിച്ചു.

കയ്യിലിരുന്ന കല്ലുകള്‍ ഈ കുളത്തില്‍ 
ഓളമുണ്ടാക്കുമ്പോള്‍
എന്‍ മനസു നിന്നെ 
തേടുകയല്ലേ

എന്നും ഈ മനസു 
നിനക്കായ് മാത്രം
ആ ഓളങ്ങള്‍ എന്നിലേക്കു 
അണയുന്നു

ഈ തണുപ്പും ഈര്‍പ്പം 
നിറഞ്ഞ പായലും
നമുക്ക് സ്വന്തമാവാന്‍ മാത്രമോ

എല്ലാം നമുക്കു മാത്രം , 
തണുപ്പ് നിന്നെ പുണരാന്‍
പായലുകള്‍ മെത്തയാക്കാന്‍

സ്നേഹമോടെ നാം തെളിനീര്‍ കുളത്തില്‍-
മുഖം നോക്കുമ്പോള്‍-
ആരൊ വലിച്ചെറിഞ്ഞു
ചെറുകല്ലുകള്‍...
കാലമാകും  പാറക്കല്ലുകള്‍